<   2016年 10月 ( 3 )   > この月の画像一覧

女兒尋校記 (四)

個校董講咩野,下一篇再講。(0岩0岩google完先知,原來個校董唔單只係自我介紹時講既舊生同家長,佢仲係創辦人個仔! 唔怪得知佢對辦學理念,所有既野都咁熟啦!)

開完個會出黎時,個天已黑! 突然間,我聽到有人同佢仔女講:"係啊! 呢D係雞雞啊! (廣東話)" 以前0係敦化南路番工,放工時聽得最多就係身邊香港路人研究誠品0係邊,有D仲會用唔鹹唔淡既國語問我! 但0係另一間學校,聽都個家長同自己仔女講廣東話,真係第一次!

他鄉遇故之,我毫不猶疑就過去問佢:

"你係咪香港人啊?"
"係啊! 好開心啊! 我地小朋友以後係同學喇!"
"但係我可能唔會讀啊,因為我地諗住下半年番香港。。。"

(見0個度無人聽得明廣東話先敢講咋! 玩野咩? 0係人地地投抽完籤又話唔讀...)

跟住我就同佢略略講我地個plan. 即爸爸留0係度,我地三個番去。

"但係咁樣分開,對一個家庭唔好架! 或者個天俾你抽到,就係想你地留底。"

就係呢句說話,影響晒我之後全盤決定! 仲要係一個香港人,親口用廣東話對住我講! 可想而知對我既impact有幾大!!!

當然,鋪排左成半年既計劃,唔會真係一句說話而推翻。(我當時已經廣鋪人脈,請朋友幫我留意香港工作。) 番到屋企,我就打電話比我寥寥可數,唯一住0係爬樹學校0個區既朋友意見。因為佢都有接觸0個區學校既小朋友同家長。再加上,佢自己都係同日本老公分隔兩地,自己同兩個仔女0係台北,老公日本台灣兩地飛。

我估唔到,連佢呢對我眼中work既couple, 都勸我無咩一頭家唔好分開。。。之後都問左唔少朋友同屋企人意見,都係支持我留低。最後諗住橫掂deposit都係大概港幣兩千幾三千蚊,都係去俾左先再慢慢諗啦!
[PR]
by qoldpretty | 2016-10-24 16:02 | Becoming a Mama

女兒尋校記 (三)

呢間學校確係大牌! 人地其他私校都weekend先黎抽籤,佢就安排抽籤日0係其中一個禮拜二下晝!!

教書比起其他行業就有呢度好,如果無堂的話,基本上係flexible既。但我上個學期比人排到個schedule滿到上個廁所都無時間,唔好話搭個幾鐘巴士入去,抽完籤再熬巴士出黎啦! 點知抽籤0個個禮拜,撞0岩有一班學生出去爬雪山(台灣第二高山,中學畢業前活動之一),下晝咁岩係佢地班double lesson, 連埋空堂, 竟然可以free左個下晝出黎! 我就算唔出黎抽籤,結果都係虛渡左個下晝,唔出去抽我一定會後悔。反正無堂上唔洗扣人工,咁就梗係名正言順請事假啦!

其實當時心態都係姑且去抽一抽,比自己心息。因為其實0個時已悄悄打算辭職,帶兩個女番香港,讀一年幼稚園適應環境同語言,(面試香港幼稚園兩個都已收),準備出年入讀MCS (計過如無意外應該夠分)。

所謂抽籤,就係寫小朋友資料落張紙,再放入支細既test tube度,再放入個透明箱。等齊人過兩三個鐘之後就抽籤。現場一個volunteer家長黎抽,抽中0個個小朋友家長再抽下一位。

我當時的確係平常心,無咩expectation. 不過我硬係覺得個天係同我作對。你想生仔時,又生唔出,到你無諗過要有時,又突然中左。當我好平靜,坐埋一邊同個friend whatsapp時,抽第8個就聽到我個女個名! 我0個時個心即刻亂晒! 中六合彩又唔見我咁易中??! 打比老公又照樣打足左成個鐘都無人聽! 應該陸陸續續抽完,我見個個家長都已經攞晒錢出黎比deposit...

我走過去問園長: 我宜家唔比錢係咪就等於放棄架? 因為我到宜家都仲未搵到細路既爸爸。。。

佢話: 我比你再考慮一晚。你入去一齊聽左我地董事個說明會先啦!

就係咁,人地個個都懷住中獎既心情入去,我就幻得幻失,心虛地走入去坐埋一角。
[PR]
by qoldpretty | 2016-10-07 11:59 | Becoming a Mama

女兒尋校記 (二)

兩個女既音樂班老師係美籍華人, 老婆係日本人。我幾buy佢教音樂既方法同辦學理念。見佢兩個小朋友都係笑咪咪大大方方,唔係我平時見開比功課壓力迫到唔敢出聲,又或係懶醒既小大人,我就好奇問佢小朋友0係邊讀書。音樂老師提供左"爬樹學校"大概幾時說明會,作為家長佢對學校觀感之類資訊。

要去說明會,要先0係網上填張form,再寄番去比佢。張form唔係填基本資料咁簡單。佢有中英文版本 (which is not common here in Taiwan), 跟住仔女國籍有兩個空格比你填。會問你爸爸媽媽同小朋友主要溝通語言,一個星期幾多餐晚飯一齊食;weekend家庭活動係咩,對子女既期望係咩,仲要0係20個形容詞入面圈幾個最0岩自己仔女既等等。其實到最後都係抽籤,我唔知佢填咁多做咩,可能佢只有做一張form, 中小學幼稚園都係用同一張掛。但你可以睇到,間學校既target學生對象係咩人。張form對佢唔單止係"行政程序"咁簡單,佢會care每個學生既individual difference.

到左說明會當日,山長水遠去到呢間學校。學校不同既老師介紹左好多個心理教育家同佢地既理論。我雖然本身係做教育界,但我一向都覺得呢d野好理論化同idealistic, 唔一定實行到,聽下就算:P 跟住說明會其他大部分都係sell IB. 我雖然做呢行,但我對IB既認知其實係非常皮毛,亦唔知IB已延伸到國中、小學、幼稚園! 最乞人憎既係要家長做pair work, discuss下咩係curriculum!!! 點啊,我而家番學校做professional training啊? 我隔離0個個ABC爸爸(好似係)就同我用流利英文share佢覺得咩係curriculum... 我心諗,好彩係我入去聽,我老公睇女嗟, 換轉係我老公入去我睇女,佢點死???!

結論係: 呢間係好適合男仔讀既學校。因為好多上堂方法,遊樂設施,都係for男仔,佢地的確係須要比較多既活動量去令自己專注。女仔自我管理能力比較強,唔一定須要咁樣... 況且,呢間學校距離我地屋企太...遠。(交通時間個幾兩個鐘) 都係算把啦!
[PR]
by qoldpretty | 2016-10-07 11:02 | Becoming a Mama

Always believe in God*


by qoldpretty
プロフィールを見る
画像一覧