女兒尋校記 (最終回)

講番我個女,究竟我地為左佢辭職搬屋 (入晒佢數添! :P),佢究竟適唔適合呢間學校呢?

以一個媽媽身份觀察,入學後我個女既改變係顯著既! 番學第一日,佢番屋企教妹妹唱hymns,第二日同我講學校老師有教佢"說到做到"既故事,第三日,我同佢講英文,佢會自然地答我,而唔係好似以前咁呆呆滯滯唔理我… 再讀多一個禮拜,仲開始對學校教既唐詩琅琅上口。對於係一張白紙,天真無邪既佢,俾學校灌輸大量宗教思想,我係絕對ok既。我覺得無論係語言,定係價值觀,都係要小朋友呢個階段吸收,影響係最深遠。

咁佢鍾唔鍾意番學呢? So far, 佢係一個聽教聽話既學生,老師錫佢,學習又有少少成就感,佢都會鍾意番學既! 再加上,學校有好多平時玩唔到既設備,例如沙池、樹屋、氹氹轉、泰山繩(?!!) 等,所以到目前為止,佢都幾鍾意番學架! 不過就成日番到屋企就見到佢D衫又沾滿泥水…,要成日幫佢洗衫囉… 學校so far功課唔會太多,但真係睇唔少書,一個禮拜睇兩本英文一本中文書,不過好彩唔洗寫book report :P

我記得我同學曾經講過一句說話: 每個小朋友都有自己既路。雖然我同我老公都係由細就0係所謂傳統名校出身,但當年我地兩個又何嘗唔係 “僥倖”抽中同考上所謂名校,然後再踏上我地各自既路?
時代或者真係唔同,我記得當初考慮好唔好比個女讀0係台灣仲未普及既IB school,上網查資料時有篇文講過: 小朋友讀IB既家長,你要有心理準備仔女會有日同你講: 我唔想讀大學喇! 我想花d時間鑽研我有興趣既科目。我問問我自己同我老公,我地絕對OK囉! 你點知將來世界變成點呢? 最緊要係可以keep住吸取知識既熱誠,唔好俾所謂既教育同考試制度拖垮左,埋沒左。希望我呢個阿媽唔會太天真啦!

(全篇完)
[PR]
# by qoldpretty | 2016-11-10 18:10 | After being a Mrs...

女兒尋校記 (五)

終極篇其實係最難寫既一篇,因為我並唔係想為佢地學校招生。當我決定將個女送去呢度讀書時,聽到其他人對於學校既評語,大多係未聽過,之後既亦好壞參半。壞既原因,主要係台灣人對於IB仲未係好熟悉。然後,以台灣人既mindset, 唔係私校 (即復薇靜再康),就只有公立學校。

由於我個人既成長背景,我實在唔太接受到台灣主流既教育制度同考試方法。要用中文學其他學科,對我黎講亦係一大難題。而傳統私立學校,為左迎合一般既升學管道,講到尾,終極目標都係”上台大、讀醫科/法律”。為左谷收生,佢地會想盡辦法令老師train到學生攞獎 (當然學生自己都好勁+家長都會培養),或得到好既升學率。

相反,呢間學校同我地家長講: 我地唔要明星學生。學校出面從來唔貼”榜單”, 亦無貼出”狂賀XXX” 。可能,又係我既upbringing, 由細至大,都無學校/課外活動消費過我地既所謂”成就”。或者係我唔夠叻啦,但所謂"個人成就",其實0係本細細既場刊,又或者校刊入面搵到你個名,已經好開心。又何須雞乸咁大隻字,用大大banner掛0係門口話比全世界知? 我既年代,只有0個D cheap cheap補習社, 先會大大隻字寫佢咁年出左幾多個A Levels 5A, 會考A1 whatsoever…

其實呢間學校仲有好多標奇立異既規矩: 例如學生要食飽早餐先番學校,幼稚園無提供早餐 (後來發現其實係有,不過只係一樽奶+一隻蛋)、學校無校車要自己安排接送…, lunch呢,佢要求屋企人煮,帶便當,佢話孩子可以0係學校都感覺到親情同屋企有連繫blah blah blah…

總之,如果你話F學校係盡量迎合家長既需求的話,咁爬樹學校就一開始講到明,佢地有一套自己認為對小朋友好既教育理念,請配合。事實上,而家諗番,如果學校家長可以自己安排接送、自己整便當既話,佢真係可以eliminate好多只係為左賺錢,無時間理小朋友既家庭;同時,亦減輕左學校同老師既負擔。

最後一點,可能係我作為家長,一點點自私既欲(期)望。學校雖然細細地只有兩班,每班30人,但一班入面既家長有香港人(唔包括我)、日本人、加拿大人。0係台灣8年,其實一直以來我都盡力去blend in, 去追上,去融合佢地。 事實上,0係F學校我遇到既香港學生,好多都對佢地香港既根,印象模糊。我唔希望自己既仔女為左融合台灣人既社會,忘記左自己另一半既香港背景。亦希望佢從小能多接觸同佢一樣有mixed背景既人。當然,作為家長,我都舒服D,唔駛再做outcast, 有人同我同聲同氣啦!
[PR]
# by qoldpretty | 2016-11-10 18:09 | After being a Mrs...

Always believe in God*


by qoldpretty
プロフィールを見る
画像一覧